LA PICADORA

  • Obra ganadora del Concurso de Microrrelatos Mineros, de Denis Soria Fernández

06/12/2020.
Concurso de Micrrorrelatos Mineros

Concurso de Micrrorrelatos Mineros

LA PICADORA

—Ca la boca, Manuel, que nun tengo la castaña p'amagüestos. —espetó Tomasa, la picadora de Caraviés, quien yá tenía abondo con gastar les últimes pesetes de la selmana, como pa encima aguantar les marranaes del carniceru o les miraes al revisgu de les paisanes de la fila. Lo que poques sabíen ye que Manuel, “El Ranchu”, yera un confidente bien agradecíu de la Guardia Civil, un golfazu que mataba'l tiempu sacando ceruyu de les oreyes col mesmu deu col que señalaba a los vecinos.

—¡La mina nun ye llugar pa una muyer!

—Tampoco pa un home —contestaba clavando la mirada, pos el picu nun-y sacaba angüeñes desque suplicara cubrir el puestu del maríu, postráu pa siempre por mor d'un accidente. Y asina, pel día picaba nel socavón y pela nueche entibaba so casa. Pero a pesar d'abrir con remangu más metros que naide, la soberbia de los faltosos qu'entraben cada mañana cola camisa planchada mancába-y más que'l dolor de regla.

La fía, Celina, trabayaba na escombrera coles otres muyeres, enllenando vagones a palaes. Abellugaes d'aquella lluvia necia por un sacu mangáu pela cabeza, nun asperaben muncho de la vida, namás que'l turullu y el xabón-yos llimpiara la negrura y el fedor de los homes que teníen qu'apartar como quien quitaba’l sudu de la frente.

Cuando avientu enfrió'l llume de la revolución, malpenes la metá de los doscientos mineros de Santufirme pudo tornar al tayu. El restu, señalaos por un deu puercu, rucaben los dientes aguardando l'aprobación de “Esteve”, el capitán del cuartel de Posada.

—Nun me trayas más almóndrigues, ma, si me les zampen toes los guardies… —dixo Celina, quien falaba un poco más alto de lo normal dempués de quedar mediu xorda d'una hostia.

—Tate tranquila, neña. Yá lo sé… —marmulló Tomasa dende l'otru llau de los barrotes.

Polo visto, El Ranchu siguía aporfiando día sí y día tamién coles sos insinuaciones, pero esa mañana punxo la pesllera a la puerte del local y soltó la bomba:

—Ye mui fácil, Tomasa, mui fácil. Si quies que fale bien de la to fía a Esteve has poner de la to parte... 

Al poco, ensin testigu que denunciare, dexaron marchar a Celina y al restu de compañeros, conscientes d’a quién debíen la llibertá. Al carniceru, pela cueta, topáronlu delles selmanes más tarde nuna campera d'El Santufirme. Nun daba cuenta d'elli mesmu. Esbabayáu y temblorosu, enxamás volvería sacar ceruyu, nin señalar a naide…

Sabe Dios ónde metió la mano.

    •