La llingua que tenemos y debemos protexer

  • José Manuel Zapico, Secretariu xeneral de CCOO d’Asturies, en "La Nueva España"

03/05/2024.
Pola oficialidá

Pola oficialidá

La Xunta pola Defensa de la Llingua llámanos esti sábadu a una nueva manifestación en favor de la oficialidá del asturianu. Y ehí tará, una vuelta más, Comisiones Obreres, que caltién el so compromisu dende hai décades con toles iniciatives y movilizaciones en defensa de la llingua y la reivindicación de la so máxima reconocencia. Namás los intolerantes puen tar en contra.

Hai décades que la reivindicación del asturianu ta recoyida nos nuestros estatutos y documentos de congresos y que llevamos el compromisu a la práctica, col emplegu avezáu de la llingua asturiana nes nuestres ediciones y cola publicación davezu de testos n’asturianu nos medios de comunicación.

Tamién llevamos defendiendo munchu tiempu una reforma del Estatutu d’Autonomía –que tien yá más de cuatro décades– p’afayalu a les necesidaes y realidaes de güei, porque Asturies nun tien que ser más pero tampoco pue ser menos que les demás comunidaes autónomes. Una reforma qu’enanche l’autogobiernu y los derechos de la ciudadanía p’avanzar n’igualdá y que, dende llueu, declare la oficialidá de la llingua. La oficialidá ye la fórmula qu’afita la Constitución y la única manera d’amparar el nuestru patrimoniu y la nuestra cultura. Si queremos que sobreviva hai que da-y la mayor protección. 

Llamentablemente, la llexislatura pasada fracasó nel intentu, pero tendría que siguir siendo un oxetivu “de país”. Porque too sedríen beneficios y naide saldría perdiendo. La derecha democrática tendría que reflexonar sobre qué Asturies defende cuando refuga da-y el rangu máximu a una de les sos principales señes d’identidá. La oficialidá de les sos llingües nun supunxo nengún problema –más bien al contrario– pa los partíos conservadores de Galicia, País Vascu o Cataluña, que les asumieron con arguyu y naturalidá, ensin enredase en cadexu nin suponer motivo de discutiniu como ocurre n’Asturies, onde Vox ensañóse con quien la defenden.

Mentanto llega la merecida y necesaria oficialidá, el presidente del Principáu comprometióse a “garantizar” l’asturianu “en tolos ámbitos de la vida social”, y la conseyera de Cultura a poner en marcha nesta llexislatura el Plan de Normalización Llingüística y la reforma de la Llei d’Usu y Promoción del Asturianu. Bienveníos sían, porque ayudarán a dignificar y arramar la llingua, faciendo llingua al falar.

Yá son muchos años de reivindicación. La 45 Selmana de les Lletres Asturianes rinde homenaxe a Conceyu Bable, a los cincuenta años d’una entidá que fue pionera na defensa de la llingua y la cultura asturianes y que reclamó el Bable nes escueles. La meyor reconocencia que pue facese a los y les que caltuvieron el llume encesu de magar entós ye que veamos llegar la oficialidá. 

Comisiones Obreres d’Asturies dirá a la manifestación d’esti sábadu. Y va siguir faciéndolo con toles que se convoquen hasta que la nuestra llingua sía reconocida oficialmente, hasta que se solucionen esta inxusticia y esta ofiensa.

    •