“Persones y acciones inolvidables”

    Mediu sieglu yá de la Xunta de Barcelona. 50 años de ser un movimientu sociopolíticu, una punta de llanza nos centros de trabayu y de la ciudadanía escontra la dictadura, de tresformanos nun sindicatu, el primer sindicatu. Pero la historia, una historia colectiva y anónima, de persones y acciones inolvidables, entama primero. Una de les nuestres cunes ta en Xixón y el próximu xineru va cumplir 70 años. Dizse pronto, siete décades dende la primer Comisión Obrera de Mina La Camocha.

    11/04/2026.
    50 años de militancia

    50 años de militancia

    Nacimos na clandestinidá. Gracies a la nuestra llucha, a que nun nos dimos, consolidóse la democracia. Aquellos díes de cambios intensos, d’avances hacia la llibertá, nes Comisiones Obreres dimos pasos perimportantes. Unu esencial, foi la Xunta de Barcelona, onde s’acolumbró lo que depués diba ser CCOO; pa poder desendolcase como organización asamblearia y democrática, (cuando la democracia yera illegal), pa escoyer la representación, tuvimos que facer otra en Roces, Xixón. 

    Nesa xunta de tuvieron homes y muyeres que güei yá sumen más de cincuenta años de militancia nes Comisiones Obreres de Xixón como Francisco Javier Suárez, que foi secretariu xeneral de CCOO d’Asturies; Luis Felipe Capellín, el primer máximu dirixente de la federación d’Actividaes Diverses a nivel estatal, que punxo la sede en Xixón; Lola Menéndez ("la australiana”), l’asturiana de la Xunta de Barcelona; Francisco Prado Alberdi, antiguu presidente de la Fundación Juan Muñiz Zapico... Esto ye, trabayadores que depués representaron a los compañeros y compañeres, que pasaron pelos muérganos de dirección del sindicatu; pero que, ante too, yeren clase trabayadora. D’eso trata’l sindicalismu, de ser el reflexu de la sociedá, d’un movimientu, d’una acción colectiva pa intentar meyorar la vida de la xente.